برطانوی میڈیا کے مطابق یہ واقعہ گزشتہ سال اگست میں پیش آیا، جب عبداللہ تنولی لیسٹر اسکوائر میں ایک دکان پر سکیورٹی گارڈ کے طور پر ڈیوٹی انجام دے رہے تھے۔ اس دوران چاقو سے مسلح ایک حملہ آور نے 11 سالہ بچی پر حملہ کرنے کی کوشش کی، تاہم عبداللہ تنولی نے بروقت مداخلت کرتے ہوئے بچی کی جان بچا لی۔

عدالت میں سماعت کے دوران جج نے عبداللہ تنولی کی جرات، حاضر دماغی اور فوری اقدام کی بھرپور تعریف کی اور عوامی فنڈز سے ایک ہزار پاؤنڈ بطور انعام دینے کا حکم جاری کیا۔ عدالت نے حملہ آور پون پنٹارو کو ہائی سکیورٹی مینٹل ہسپتال منتقل کرنے کا بھی حکم دیا۔

رپورٹ کے مطابق عبداللہ تنولی نے بچی کی چیخیں سن کر فوراً صورتحال کا جائزہ لیا اور دیگر سکیورٹی گارڈز کی مدد سے حملہ آور کو پولیس کے پہنچنے تک قابو میں رکھا، جس کے باعث ایک بڑا سانحہ ٹل گیا۔

واقعے کے بعد عبداللہ تنولی کو برطانیہ بھر میں ایک ہیرو کے طور پر سراہا جا رہا ہے، جب کہ انہیں مختلف اداروں کی جانب سے اعزازات اور تعریفی اسناد سے بھی نوازا جا چکا ہے۔