لائیوایران کو جوہری ہتھیاروں کے حصول سے روکنا جرمنی اور امریکا کا مشترکہ مقصد ہے: جرمن وزیر خارجہ
جرمنی کے وزیر خارجہ یوہان واڈیفول نے کہا ہے کہ ایران کو جوہری ہتھیاروں کے حصول سے روکنا جرمنی اور امریکا کا مشترکہ سیاسی مقصد ہے اور دونوں ممالک اس معاملے پر ایک جیسے مؤقف رکھتے ہیں۔ پیرس میں جی سیون وزرائے خارجہ کے اجلاس کے موقع پر صحافیوں سے گفتگو کرتے ہوئے انہوں نے کہا کہ ایران کے جوہری پروگرام سے متعلق خدشات دور کرنا ضروری ہے۔ جرمن وزیر خارجہ نے امید ظاہر کی کہ ایرانی حکومت بالآخر اس حقیقت کو تسلیم کرے گی کہ اسے یورینیم کی افزودگی اور جوہری ہتھیاروں کے پروگرام کو مستقل طور پر ترک کرنا ہوگا۔ ان کے بیان سے واضح ہوتا ہے کہ جرمنی اور امریکا ایران کے جوہری پروگرام کو خطے اور عالمی سلامتی کے تناظر میں اہم معاملہ سمجھتے ہیں اور اس حوالے سے ایران سے مستقل حل کی توقع رکھتے ہیں۔
