مہمان ٹیم نے آج تیسرے روز کھیل کا آغاز 3 وکٹوں کے نقصان پر 114 رنز سے کیا۔ دن کے اختتام پر دھننجیا ڈی سلوا 167 اور کوشل مینڈس 117 رنز بنا کر ناٹ آؤٹ ہیں۔
دھننجیا ڈی سلوا اور کوشل مینڈس کے درمیان پانچویں وکٹ کے لیے 249 رنز کی ناقابل شکست شراکت قائم ہوچکی ہے۔ پاکستانی بولرز تیسرے روز صرف ایک وکٹ حاصل کرنے میں کامیاب رہے۔
سری لنکا کو پاکستان کی پہلی اننگز کی برتری ختم کرنے کے لیے مزید 30 رنز درکار ہیں۔ پاکستان کی جانب سے ثاقب خان اور محمد عباس نے 2، 2 وکٹیں حاصل کیں۔
یاد رہے کہ گزشتہ روز خراب روشنی کے باعث کھیل ختم کرنا پڑا تھا، جس کے نتیجے میں سری لنکا نے 27.1 اوورز کا سامنا کیا تھا۔
گزشتہ روز راولپنڈی ٹیسٹ کے دوسرے دن کا کھیل مکمل ہوا تھا، جس میں سری لنکا نے پاکستان کے 434 رنز کے جواب میں 3 وکٹوں کے نقصان پر 114 رنز بنائے تھے۔
پاکستان کی جانب سے سعود شکیل 93 رنز بنا کر نمایاں رہے، تاہم وہ سنچری مکمل کرنے سے قبل آؤٹ ہوگئے۔ طیب عارف نے 57، عرفات منہاس نے 52، محمد طٰہٰ نے 51 اور کپتان بابر اعظم نے 50 رنز کی اننگز کھیلی۔ اس طرح قومی ٹیم کے پانچ کھلاڑیوں نے نصف سنچریاں اسکور کیں۔
سری لنکا کی جانب سے اسیتھا فرنینڈو اور دلشان مدوشنکا نے 3، 3 وکٹیں حاصل کیں، جبکہ ملان رتھنائیکے نے ایک کھلاڑی کو آؤٹ کیا۔
جواب میں سری لنکا نے دوسرے روز کھیل کے اختتام تک 3 وکٹوں کے نقصان پر 114 رنز بنائے تھے۔ پاکستان کی جانب سے ٹیسٹ کرکٹ میں ڈیبیو کرنے والے ثاقب خان نے 2 وکٹیں حاصل کیں۔
خراب روشنی کے باعث دوسرے روز کا کھیل مقررہ وقت سے پہلے ختم کرنا پڑا اور مجموعی طور پر 66.2 اوورز کا کھیل ممکن ہوسکا۔
پاکستان کی پہلی اننگز 434 رنز پر ڈکلیئر
راولپنڈی کرکٹ اسٹیڈیم میں پیر کو سیریز کے پہلے ٹیسٹ میچ میں سری لنکا نے ٹاس جیت کر پہلے بولنگ کا فیصلہ کیا تھا۔ مہمان ٹیم کا یہ فیصلہ ابتدائی روز اس کے لیے فائدہ مند ثابت نہ ہوسکا اور پاکستان نے ابتدائی دو وکٹیں گنوانے کے بعد اپنی اننگز کو سنبھال لیا۔
پاکستان کی جانب سے اننگز کا آغاز اذان اویس اور طیب عارف نے کیا۔ دونوں نے پہلی وکٹ کے لیے 86 رنز کی شراکت قائم کی۔ اذان اویس 30 رنز بنا کر ملان رتھنائیکے کی گیند پر کیچ آؤٹ ہوئے۔
ٹیسٹ کرکٹ میں ڈیبیو کرنے والے طیب عارف نے جارحانہ بیٹنگ کرتے ہوئے 51 گیندوں پر 57 رنز بنائے۔ ان کی اننگز میں 9 چوکے اور ایک چھکا شامل تھا۔
پاکستان کو 90 رنز کے مجموعی اسکور پر دوسری وکٹ کا نقصان اٹھانا پڑا، جس کے بعد کپتان بابر اعظم نے ڈیبیو کرنے والے محمد طٰہٰ کے ساتھ اننگز کو سنبھالا اور تیسری وکٹ کے لیے اہم شراکت قائم کی۔
بابر اعظم نے 58 گیندوں پر 50 رنز بنائے، جس میں 7 چوکے شامل تھے۔ وہ 159 کے مجموعی اسکور پر ملان رتھنائیکے کی گیند پر کیچ آؤٹ ہوئے۔
بابر اعظم کے آؤٹ ہونے کے بعد سعود شکیل نے محمد طٰہٰ کا ساتھ دیا اور چوتھی وکٹ کے لیے 68 رنز کی شراکت قائم کی۔ محمد طٰہٰ نے اپنے ڈیبیو ٹیسٹ میں محتاط بیٹنگ کرتے ہوئے نصف سنچری مکمل کی۔ وہ 6 چوکوں کی مدد سے 51 رنز بنا کر 227 کے مجموعی اسکور پر آؤٹ ہوئے۔
سعود شکیل اور سلمان علی آغا نے اسکور آگے بڑھایا، تاہم 253 رنز کے مجموعی اسکور پر سلمان علی آغا 16 رنز بنا کر پویلین لوٹ گئے۔
پاکستان نے اس ٹیسٹ میچ کے لیے ٹیم میں بڑی تبدیلیاں کرتے ہوئے چار کھلاڑیوں کو پہلی مرتبہ ٹیسٹ کرکٹ میں ملک کی نمائندگی کا موقع دیا۔ ان کھلاڑیوں میں طیب عارف، محمد طٰہٰ، عرفات منہاس اور ثاقب خان شامل ہیں۔
قومی ٹیم کی پلیئنگ الیون میں اذان اویس، طیب عارف، محمد طٰہٰ، بابر اعظم، سعود شکیل، سلمان علی آغا، غازی غوری، عرفات منہاس، رضوان اللہ، محمد عباس اور ثاقب خان شامل ہیں۔
سری لنکا نے پہلے ٹیسٹ کے لیے اپنی پلیئنگ الیون میں تجربہ کار اسپنر پربتھ جے سوریا کو شامل نہیں کیا اور چار فاسٹ بولرز کے ساتھ میدان میں اترنے کا فیصلہ کیا تھا۔
ٹاس کے بعد گفتگو کرتے ہوئے سری لنکن کپتان کوشل مینڈس نے کہا تھا کہ پچ پر گھاس موجود ہے، جس سے ابتدائی سیشن میں فاسٹ بولرز کو مدد مل سکتی ہے۔ ان کے مطابق پچ فاسٹ بولنگ کے لیے سازگار دکھائی دے رہی ہے اور پہلا سیشن اہم ہوگا۔
سری لنکا کی پلیئنگ الیون میں کوشل مینڈس، لہرو اودارا، پاسندو سوریا بندارا، دنیش چندیمل، کمیندو مینڈس، دھننجایا ڈی سلوا، سونل دینوشا، ملان رتھنائیکے، لہرو کمارا، اسیتھا فرنینڈو اور دلشان مدوشنکا شامل ہیں۔
آئی سی سی ورلڈ ٹیسٹ چیمپئن شپ کے موجودہ پوائنٹس ٹیبل پر پاکستان نویں اور آخری نمبر پر ہے، جبکہ سری لنکا ساتویں پوزیشن پر موجود ہے۔ دونوں ٹیموں کے لیے یہ سیریز چیمپئن شپ میں اپنی پوزیشن بہتر بنانے کا موقع ہے۔
پاکستان اور سری لنکا کے درمیان سیریز کا دوسرا اور آخری ٹیسٹ 17 نومبر سے پنڈی میں ہی کھیلا جائے گا۔
واضح رہے کہ پنڈی کرکٹ اسٹیڈیم میں کھیلے جا رہے سیریز کے پہلے ٹیسٹ کے دوسرے روز پاکستان نے اپنی پہلی اننگز 9 وکٹوں کے نقصان پر 434 رنز بنا کر ڈکلیئر کردی تھی۔
پاکستان کی جانب سے پہلی اننگز میں مڈل آرڈر بیٹر سعود شکیل 93 رنز کے ساتھ نمایاں رہے تھے۔ ان کے علاوہ کپتان بابر اعظم، طیب عارف اور محمد طٰہٰ نے نصف سنچریاں بنائی تھیں۔
