سعودی عرب کی سرکاری خبر رساں ایجنسی کے مطابق سعودی آئل کمپنی آرامکو کا ایک ہیلی کاپٹر اتوار کی صبح راس تنورہ کے علاقے میں گر کر تباہ ہو گیا، جس کے نتیجے میں اس میں سوار تمام 14 افراد جاں بحق ہو گئے۔

رپورٹ کے مطابق یہ افسوسناک حادثہ 28 جون کی صبح تقریباً 6 بجے پیش آیا۔ حادثے کا شکار ہونے والے ہیلی کاپٹر میں سوار تمام افراد سعودی شہری تھے اور کوئی بھی زندہ نہ بچ سکا۔

سعودی وزارتِ توانائی نے واقعے کی تصدیق کرتے ہوئے بتایا کہ حادثے کی وجوہات جاننے کے لیے متعلقہ اداروں کے تعاون سے تحقیقات کا آغاز کر دیا گیا ہے۔

وزارتِ توانائی نے حادثے میں جاں بحق ہونے والے افراد کے اہلِ خانہ سے دلی تعزیت اور ہمدردی کا اظہار کرتے ہوئے کہا ہے کہ اس المناک سانحے کی مکمل تحقیقات کی جائیں گی اور حقائق سامنے لائے جائیں گے۔