خبررساں ادارے کے مطابق حکام کا کہنا ہے کہ حادثے کا شکار ہونے والے طیارے میں 114 فوجی اہلکار سوار تھے، جب کہ عملے کے 11 ارکان بھی اس میں موجود تھے۔

کولمبیا کی فضائیہ کے کمانڈر کارلوس فرنینڈو سلوا روئدا نے بتایا کہ امریکی ساختہ C-130 ہرکیولس طیارہ، جو فوجی اہلکاروں کی نقل و حمل کے لیے استعمال ہوتا ہے، پوتومایو صوبے کے قصبے پورٹو لیگویزامو کے قریب گر کر تباہ ہوا۔

حادثے کے فوراً بعد ہنگامی امدادی ٹیموں کو جائے وقوعہ پر روانہ کر دیا گیا، جہاں وہ ملبے میں زندہ بچ جانے والوں کی تلاش میں مصروف ہیں۔ حکام کا کہنا ہے کہ حادثے کی وجوہات جاننے کے لیے تحقیقات جاری ہیں۔

کولمبیا کے وزیر دفاع پیڈرو سانچیز نے واقعے کی تصدیق کرتے ہوئے کہا کہ لاک ہیڈ مارٹن کا تیار کردہ ہرکیولس C-130 ٹرانسپورٹ طیارہ پورٹو لیگویزامو سے پرواز کے دوران سکیورٹی فورسز کے اہلکاروں کو لے جاتے ہوئے ایک المناک حادثے کا شکار ہوا۔

انہوں نے کہا کہ پیرو کی سرحد کے قریب پیش آنے والا یہ واقعہ ملک کے لیے انتہائی افسوسناک ہے۔

ایک فوجی ذریعے نے خبر رساں ادارے اے ایف پی کو بتایا کہ ہلاک ہونے والوں میں 58 فوجی، چھ فضائیہ اہلکار اور دو پولیس افسر شامل ہیں، جب کہ دیگر ذرائع نے بھی مجموعی ہلاکتوں کی تعداد 66 بتائی ہے۔

واضح رہے کہ یہ حادثہ کولمبیا کی فضائیہ کی حالیہ تاریخ کے مہلک ترین حادثات میں شمار کیا جا رہا ہے۔