حرمین شریفین کی دیکھ بھال کرنے والی جنرل اتھارٹی کے مطابق غسلِ کعبہ کا عمل تین بنیادی مراحل پر مشتمل ہوگا۔ پہلے مرحلے میں تمام ضروری تیاریوں اور سامان کو ترتیب دیا جائے گا، دوسرے مرحلے میں خانہ کعبہ کو مخصوص خوشبودار محلول سے غسل دیا جائے گا، جبکہ آخری مرحلے میں کعبہ کی اندرونی دیواروں اور فرش کو عود، بخور اور دیگر اعلیٰ معیار کی خوشبوؤں سے معطر کیا جائے گا۔

انتظامیہ کا کہنا ہے کہ غسلِ کعبہ کی تقریب ہر سال انتہائی عقیدت، احترام اور منظم انداز میں منعقد کی جاتی ہے، جس میں استعمال ہونے والا ہر سامان پہلے سے تیار اور جدید معیار کے مطابق محفوظ رکھا جاتا ہے تاکہ تقریب تمام مذہبی روایات کے مطابق مکمل ہو۔

اتھارٹی کے مطابق اس سال غسلِ کعبہ کے لیے 15 لیٹر آبِ زمزم، 15 لیٹر عرقِ گلاب، 15 لیٹر گلاب کا تیل اور 100 ملی لیٹر خالص عود کا تیل مختص کیا گیا ہے۔ ان خوشبودار اجزاء کو غسل اور بعد ازاں خانہ کعبہ کو معطر کرنے کے مراحل میں استعمال کیا جائے گا۔

حرمین شریفین انتظامیہ نے بتایا کہ تقریب کے دوران تمام انتظامی اور فنی امور جدید سروس سسٹمز کے تحت انجام دیے جائیں گے تاکہ غسلِ کعبہ کا عمل نہایت محفوظ، منظم اور باوقار انداز میں مکمل ہو سکے۔

غسلِ کعبہ کی سالانہ تقریب عالم اسلام کے لیے خصوصی روحانی اہمیت رکھتی ہے اور دنیا بھر کے مسلمان اس مقدس موقع کو عقیدت و احترام کی نگاہ سے دیکھتے ہیں۔ اس موقع پر خانہ کعبہ کی خدمت اور دیکھ بھال سے متعلق تمام مراحل اسلامی روایات اور دیرینہ مذہبی اقدار کے مطابق انجام دیے جاتے ہیں۔