پاکستان نے چوتھے دن کھیل کے اختتام تک اپنی دوسری اننگز میں 5 وکٹوں کے نقصان پر 177 رنز اسکور کر لیے ہیں اور اسے جیت کے لیے مزید 260 رنز درکار ہیں۔ اس سے قبل بنگلا دیش نے پاکستان کو جیت کے لیے 437 رنز کا مشکل ہدف دیا تھا۔
پاکستانی اننگز کا آغاز کچھ زیادہ بہتر نہ رہا اور اوپنر عبد اللہ فضل 6 رنز بنا کر ناہید رانا کی گیند پر آؤٹ ہوگئے۔ کچھ ہی دیر بعد اذان اویس بھی 21 رنز بنا کر پویلین لوٹ گئے، جس کے بعد ٹیم پر دباؤ بڑھ گیا۔
ابتدائی نقصان کے بعد بابر اعظم اور شان مسعود نے ذمہ دارانہ بیٹنگ کرتے ہوئے اسکور کو سہارا دیا۔ دونوں کھلاڑیوں نے صورتحال کو سنبھالا اور اسکور کو آگے بڑھایا، تاہم بابر اعظم 47 رنز کی اننگز کھیل کر تیج الاسلام کا شکار بن گئے۔
اس کے بعد وکٹ پر موجود دیگر بیٹرز بھی بڑی شراکت قائم کرنے میں ناکام رہے، مگر شان مسعود نے ایک اینڈ سنبھالے رکھا اور 64 رنز کے ساتھ کریز پر موجود ہیں۔ ٹیم کو اب ان سے ایک بڑی اور طویل اننگز کی امید ہے۔
مزید پڑھیں: فاسٹ بولر محمد عباس نے پروفیشنل کرکٹ میں ایک ہزار وکٹوں کا تاریخی سنگ میل عبور کر لیا
اس سے قبل میچ میں بنگلا دیش نے پہلی اننگز میں 278 رنز بنائے تھے، جس کے جواب میں پاکستان ٹیم 232 رنز پر آؤٹ ہو گئی تھی اور اسے 46 رنز کا خسارہ برداشت کرنا پڑا۔
بعد ازاں میزبان ٹیم نے اپنی دوسری اننگز میں 390 رنز بنا کر پاکستان کو ایک بڑا ہدف دے دیا، جو اب میچ کے فیصلہ کن مرحلے میں داخل ہو چکا ہے۔ پاکستان کو میچ بچانے اور جیتنے کے لیے آخری دن شاندار بیٹنگ کارکردگی دکھانا ہوگی۔
