پی سی بی کی جانب سے جاری اعلامیے کے مطابق پانچ میچوں پر مشتمل سیریز کا آغاز 15 مئی 2027 کو ساؤتھمپٹن میں ہوگا، جبکہ دوسرا ون ڈے 19 مئی کو مانچسٹر، تیسرا 21 مئی کو لیڈز، چوتھا 23 مئی کو چیسٹر-لے-اسٹریٹ اور پانچواں و آخری میچ 26 مئی کو کارڈف میں کھیلا جائے گا۔
بورڈ کے مطابق یہ سیریز اکتوبر اور نومبر 2027 میں جنوبی افریقہ، زمبابوے اور نمیبیا کی مشترکہ میزبانی میں ہونے والے آئی سی سی مینز کرکٹ ورلڈ کپ سے قبل دونوں ٹیموں کو اپنی تیاریوں کو حتمی شکل دینے کا بہترین موقع فراہم کرے گی۔ ماہرین کے مطابق انگلینڈ کی کنڈیشنز میں کھیلنے کا تجربہ پاکستانی کھلاڑیوں کے لیے بھی انتہائی مفید ثابت ہوگا۔
پی سی بی نے یہ بھی بتایا کہ قومی ٹیم اس وقت ویسٹ انڈیز کے دورے پر دو ٹیسٹ میچوں کی سیریز میں مصروف ہے۔ اس کے بعد پاکستان کی ٹیم 19 اگست سے 13 ستمبر تک انگلینڈ میں تین ٹیسٹ میچوں کی سیریز بھی کھیلے گی، جس کے باعث دونوں ممالک کے درمیان آئندہ برسوں میں کرکٹ روابط مزید مضبوط ہوں گے۔
آئی سی سی کی تازہ ترین مینز ون ڈے رینکنگ کے مطابق پاکستان اس وقت پانچویں جبکہ انگلینڈ ساتویں نمبر پر موجود ہے۔ دونوں ٹیموں کے درمیان ہونے والی یہ سیریز نہ صرف رینکنگ کے اعتبار سے اہم ہوگی بلکہ ورلڈ کپ سے قبل بہترین کمبی نیشن تشکیل دینے کا بھی اہم موقع ثابت ہوگی۔
پاکستان نے آخری مرتبہ 2021 میں ون ڈے سیریز کے لیے انگلینڈ کا دورہ کیا تھا۔ اگرچہ تین میچوں کی اس سیریز میں قومی ٹیم کو شکست کا سامنا کرنا پڑا، تاہم اس وقت کے کپتان بابر اعظم نے شاندار بیٹنگ کا مظاہرہ کرتے ہوئے تین اننگز میں 177 رنز اسکور کیے تھے۔ ان کی یادگار 158 رنز کی اننگز آج بھی انگلینڈ میں پاکستانی بیٹنگ کی بہترین انفرادی کارکردگیوں میں شمار کی جاتی ہے۔
مزید پڑھیں : آسڑیلوی پلئیر ڈیوڈ وارنر نے اپنی غلطی تسلیم کر لی، سزا کا فیصلہ 18 اگست کو ہوگا
شائقین کرکٹ کو امید ہے کہ 2027 کی یہ پانچ میچوں کی سیریز دونوں ٹیموں کے درمیان سخت اور دلچسپ مقابلوں کا باعث بنے گی، جبکہ پاکستان کے لیے ورلڈ کپ سے قبل اپنی تیاریوں اور کمبی نیشن کو مزید مضبوط بنانے کا اہم مرحلہ بھی ثابت ہوگی۔
