میامی میں کھیلے گئے اس دلچسپ مقابلے میں کیپ وردے نے عالمی چیمپئن ارجنٹینا کو سخت ٹکر دی، تاہم میسی نے ایک بار پھر ثابت کیا کہ بڑے مقابلوں میں وہ کس طرح ایک لمحے میں کھیل کا رخ بدل سکتے ہیں۔ لیسانڈرو مارٹینیز کی شاندار پاس پر میسی نے دفاعی لائن کو چیرتے ہوئے بہترین انداز میں گیند کو اپنے قابو میں لیا اور نہایت نفاست سے گول کیپر کے اوپر سے گیند جال میں پہنچا کر ارجنٹینا کو برتری دلائی۔
یہ گول نہ صرف میچ کا اہم ترین لمحہ ثابت ہوا بلکہ ورلڈ کپ میں میسی کا ساتواں گول بھی تھا، جس کے بعد وہ گولڈن بوٹ کی دوڑ میں سب سے آگے ہیں۔ اس سے قبل وہ الجزائر کے خلاف ہیٹ ٹرک، آسٹریا کے خلاف دو جبکہ اردن کے خلاف ایک گول بھی کر چکے ہیں۔
39 سالہ میسی نے اس ٹورنامنٹ میں ایک کے بعد ایک ریکارڈ اپنے نام کیے ہیں۔ وہ مردوں اور خواتین دونوں کی ورلڈ کپ تاریخ میں 20 گول کرنے والے پہلے کھلاڑی بن گئے ہیں۔ اس کے علاوہ وہ مسلسل آٹھ ورلڈ کپ میچز میں گول کرنے والے پہلے فٹبالر بھی ہیں، جبکہ دو مختلف ورلڈ کپ ٹورنامنٹس میں سات یا اس سے زیادہ گول اسکور کرنے والے بھی پہلے کھلاڑی بن گئے ہیں۔
اگرچہ کیپ وردے نے پورے میچ میں غیرمعمولی مزاحمت کی اور ارجنٹینا کو اضافی وقت تک کھیلنے پر مجبور کیا، لیکن میسی کا شاندار گول ایک بار پھر ان کی غیرمعمولی صلاحیت، بہترین ٹائمنگ اور بڑے مواقع پر فیصلہ کن کردار ادا کرنے کی صلاحیت کا ثبوت بن گیا۔
مزید پڑھیں: ویمنز ٹی ٹوئنٹی ورلڈ کپ: انگلینڈ نے جنوبی افریقا کو شکست دے کر فائنل میں جگہ بنا لی
فٹبال مبصرین نے بھی میسی کی بھرپور تعریف کی۔ سابق اسکاٹش انٹرنیشنل جیمز میک فیڈن نے ان کے گول کو "ناقابلِ یقین فنش" قرار دیتے ہوئے کہا کہ میسی کی دوڑ، پہلا ٹچ اور اختتام عالمی معیار کا تھا
میسی کی قیادت میں ارجنٹینا اب ورلڈ کپ کے اگلے مرحلے میں پہنچ چکا ہے، جبکہ شاندار فارم میں موجود کپتان نہ صرف اپنی ٹیم کو ایک اور عالمی ٹائٹل دلانے کی کوشش کر رہے ہیں بلکہ گولڈن بوٹ جیتنے کے بھی مضبوط ترین امیدوار بن گئے ہیں۔ اگر وہ اسی فارم کو برقرار رکھتے ہیں تو ورلڈ کپ 2026 ایک مرتبہ پھر لیونل میسی کے نام ہو سکتا ہے۔
