فرانس کے 27 سالہ فٹبالر کلیان ایمباپے نے اس ٹورنامنٹ میں شاندار کارکردگی کا مظاہرہ کرتے ہوئے 8 میچوں میں 10 گول داغے۔ قطر 2022 کے ورلڈ کپ میں 8 گولز کے ساتھ ٹاپ اسکورر رہنے والے ایمباپے نے اس بار اپنے ہی ریکارڈ کو مزید بہتر بنایا۔
ایمباپے 1970 کے ورلڈ کپ میں مغربی جرمنی کے گرڈ ملر کے بعد پہلے مرد کھلاڑی ہیں جنہوں نے ایک ہی ٹورنامنٹ میں 10 یا اس سے زیادہ گول کیے۔ تاریخ میں ان سے زیادہ گول صرف فرانس کے جسٹ فونٹین (1958 میں 13 گول) اور ہنگری کے سینڈور کوکسس (1954 میں 11 گول) کے نام ہیں۔
ان 10 گولز کے ساتھ ایمباپے اب ورلڈ کپ کی تاریخ کے سب سے زیادہ گول کرنے والے کھلاڑی بن گئے ہیں، جن کے کل گولز کی تعداد 22 ہو چکی ہے جو لیوئل میسی سے ایک گول زیادہ ہے۔
ایمباپے کی اس ٹورنامنٹ میں پیشرفت پر نظر ڈالی جائے تو انہوں نے گروپ اسٹیج میں سینیگال اور عراق کے خلاف دو دو گول کیے، اور لاسٹ 32 میں سویڈن کے خلاف جال چھوا۔ اس کے بعد لاسٹ 16 میں پیراگوئے کے خلاف 70ویں منٹ میں پینلٹی پر فیصلہ کن گول اسکور کیا، جبکہ کوارٹر فائنل میں مراکش کو بھی اپنے گول کا نشانہ بنایا۔
ہفتے کے روز میامی میں تیسری پوزیشن (برونز میچ) کے مقابلے میں ایمباپے نے انگلینڈ کے خلاف دو گول کر کے میسی پر اپنی برتری قائم کی اگرچہ فرانس کو اس سنسنی خیز میچ میں 6-4سے شکست کا سامنا کرنا پڑا اور ٹیم چوتھی پوزیشن پر رہی۔
میچ کے بعد گفتگو کرتے ہوئے ایمباپے کا کہنا تھا:
جب آپ ورلڈ کپ میں اتنے زیادہ گول کرتے ہیں، تو یہ یقیناً آپ کو ایک بالکل نئی بلندی پر لے جاتا ہے۔ لیکن میں ٹاپ اسکورر بننے کے بجائے اپنی ٹیم کے لیے فائنل کھیلنا زیادہ پسند کرتا۔
مزید پڑھیں: 2027 ورلڈ کپ میرا سب سے بڑا ہدف ہے، نئی گیند کا سامنا کرنا آسان نہیں ہوتا: فخر زمان
نیو جرسی کے میٹ لائف اسٹیڈیم میں کھیلے گئے فائنل سے قبل 39 سالہ لیوئل میسی کے پاس ایمباپے کو پیچھے چھوڑنے کا موقع تھا، جس کے لیے انہیں ہیٹ ٹرک کی ضرورت تھی۔ تاہم، سپین کے مضبوط دفاع نے انہیں کوئی موقع نہ دیا اور ارجنٹائن کو 1-0 سے شکست کا سامنا کرنا پڑا۔ میسی نے ٹورنامنٹ کا اختتام 8 میچوں میں 8 گولز کے ساتھ کیا اور انہیں ٹورنامنٹ کا سلور بال دیا گیا، جبکہ ایمباپے نے برونز بال اپنے نام کیا۔
ٹاپ اسکوررز کی فہرست میں انگلینڈ کے جوڈ بیلنگھم اور ناروے کے ایرلنگ ہالینڈ 7, 7 گولز کے ساتھ تیسرے نمبر پر رہے، جبکہ فرانس کے عثمان دیمبیلے اور انگلش کپتان ہیری کین نے 6, 6 گولز اسکور کیے۔
