میچ کا آغاز ناروے نے جارحانہ انداز میں کیا اور چوتھے ہی منٹ میں پیٹرک برگ نے گیند جال میں پہنچا دی، تاہم الیگزینڈر سورلوتھ آف سائیڈ قرار پائے، جس کے باعث گول مسترد کر دیا گیا۔
برازیل کو 15ویں منٹ میں برتری حاصل کرنے کا سنہری موقع ملا، جب میتھیوس کونیا پر فاؤل کے بعد پنالٹی دی گئی، لیکن برونو گیمارائش کی پنالٹی ناروے کے تجربہ کار گول کیپر اوریان نیلانڈ نے شاندار انداز میں روک لی۔
دوسرے ہاف میں برازیل نے کئی حملے کیے، مگر ونیسیئس جونیئر اور اینڈرک سمیت کسی بھی کھلاڑی نے اپنے مواقع سے فائدہ نہ اٹھایا۔ اس کے برعکس ناروے نے محدود مواقع کو بھرپور انداز میں استعمال کیا۔
79ویں منٹ میں اینڈریاس شیلڈروپ کے عمدہ کراس پر ارلنگ ہالینڈ نے دفاعی کھلاڑی گیبریل کو پیچھے چھوڑتے ہوئے طاقتور ہیڈر کے ذریعے ناروے کو برتری دلا دی۔
میچ کے اختتامی لمحات میں ہالینڈ نے باکس کے باہر سے زبردست شاٹ لگا کر اپنی ٹیم کی برتری دگنی کر دی اور برازیل کی واپسی کی تمام امیدیں ختم کر دیں۔
اضافی وقت میں برازیل کو ایک اور پنالٹی ملی، جسے نیمار نے گول میں تبدیل کیا، تاہم یہ گول صرف شکست کا مارجن کم کرنے تک محدود رہا اور برازیل 2-1 سے شکست کھا کر ٹورنامنٹ سے باہر ہو گیا۔
اس فتح کے ساتھ ناروے نے پہلی بار ورلڈ کپ کے کوارٹر فائنل میں رسائی حاصل کر لی، جہاں اس کا مقابلہ انگلینڈ سے ہوگا۔
مزید پڑھیں: دوسرا ٹی ٹوئنٹی: انگلینڈ نے انڈیا کو 4 وکٹوں سے شکست دے دی
ارلنگ ہالینڈ نے اس میچ میں دو گول کر کے ٹورنامنٹ میں اپنے گولز کی تعداد سات کر لی اور وہ گولڈن بوٹ کی دوڑ میں لیونل میسی اور کیلیان ایمباپے کے برابر آ گئے ہیں۔
دوسری جانب، برازیل کی حیران کن ناکامی کے بعد ہیڈ کوچ کارلو آنچیلوتی کے مستقبل پر سوالات اٹھنے لگے ہیں۔ اگرچہ ان کا معاہدہ 2030 تک ہے، لیکن ورلڈ کپ سے قبل از وقت اخراج نے برازیلین فٹبال میں نئی بحث چھیڑ دی ہے۔
