میچ کے چوتھے دن بنگلادیش کے اوپنرز نے کھیل کا آغاز کیا تاہم پاکستانی بولرز نے جلد ہی دباؤ بڑھا دیا۔ اس دوران اسکور 15 رنز پر پہنچا تو محمد عباس نے عمدہ بولنگ کا مظاہرہ کرتے ہوئے اوپنر محمود الحسن جوئے کو آؤٹ کر کے پویلین واپس بھیج دیا۔
بنگلادیش کو دوسرا نقصان 23 رنز کے مجموعی اسکور پر ہوا جب شادمان اسلام 10 رنز بنا کر حسن علی کی گیند پر آؤٹ ہوگئے۔ اس طرح میزبان ٹیم پر ابتدائی مرحلے میں ہی دباؤ بڑھ گیا ہے۔
دوسری جانب پاکستان کی بولنگ اٹیک میں محمد عباس اور حسن علی نمایاں کارکردگی دکھا رہے ہیں جبکہ دیگر بولرز بھی لائن اور لینتھ برقرار رکھنے کی کوشش کر رہے ہیں۔
پہلی اننگز کا احوال
اس سے قبل بنگلادیش نے اپنی پہلی اننگز میں شاندار بیٹنگ کا مظاہرہ کرتے ہوئے 413 رنز بنائے تھے اور پوری ٹیم آؤٹ ہوگئی تھی۔
میزبان ٹیم کی جانب سے نجم الحسن شانتو نے 101 رنز کی سنچری اسکور کی، جبکہ مومن الحق 91 اور مشفیق الرحیم 71 رنز بنا کر نمایاں بلے باز رہے۔
پاکستان کی جانب سے بولنگ میں محمد عباس نے شاندار کارکردگی دکھاتے ہوئے 5 وکٹیں حاصل کیں، جبکہ شاہین شاہ آفریدی نے 3 کھلاڑیوں کو آؤٹ کیا۔ نعمان علی اور حسن علی نے ایک، ایک وکٹ حاصل کی۔
جواب میں پاکستان کی ٹیم اپنی پہلی اننگز میں 386 رنز بنا کر آؤٹ ہوئی، جس کے باعث بنگلادیش کو 27 رنز کی اہم برتری حاصل ہوئی۔
مزید پڑھیں: انڈیا کا پاکستان کے ساتھ کسی بھی کھیل کی دوطرفہ سیریز کھیلنے سے انکار
پاکستان کی بیٹنگ میں اذان اویس نے شاندار سنچری اسکور کرتے ہوئے 103 رنز بنائے، جبکہ عبداللّٰہ شفیق 60، محمد رضوان 59 اور سلمان علی آغا 58 رنز کے ساتھ نمایاں رہے۔ امام الحق نے 45 رنز کی اننگز کھیلی جبکہ شاہین شاہ آفریدی نے 13 رنز بنائے۔
بنگلادیش کی بولنگ میں مہدی حسن میراز نے بہترین کارکردگی دکھاتے ہوئے 5 وکٹیں حاصل کیں، جبکہ تسکین احمد اور تیج الاسلام نے 2، 2 وکٹیں اپنے نام کیں۔
یاد رہے کہ چوتھے روز کھیل کے دوران میچ دلچسپ مرحلے میں داخل ہو چکا ہے، جہاں بنگلادیش اپنی دوسری اننگز میں برتری کو مزید مستحکم کرنے کی کوشش کر رہا ہے جبکہ پاکستان جلد وکٹیں حاصل کرکے میچ میں واپسی کی کوشش میں ہے۔
