یہ تنازع اُس وقت سامنے آیا جب فیفا ورلڈ کپ کے پری کوارٹر فائنل میں فرانس کے ہاتھوں پیراگوئے کی شکست کے بعد سینیٹر سیلیسٹے اماریلا نے سوشل میڈیا پلیٹ فارم ایکس پر کیلیان ایمباپے کے نسلی پس منظر اور تعلیم سے متعلق نسل پرستانہ تبصرے کیے۔
ایمباپے نے ان بیانات کا جواب دیتے ہوئے کہا کہ سیلیسٹے اماریلا نہ صرف اپنے عہدے کے لیے نااہل ہیں بلکہ وہ پیراگوئے کے عوام کی بھی نمائندگی نہیں کرتیں۔ انہوں نے کہا کہ پیراگوئے کی ٹیم نے پورے ٹورنامنٹ میں جذبے، محنت اور عزت کے ساتھ کھیل پیش کیا، لیکن ایک سیاستدان کی غیر ذمہ دارانہ اور نسل پرستانہ گفتگو نے ان تمام کامیابیوں کو پسِ منظر میں دھکیل دیا۔
فرانسیسی فٹبال فیڈریشن نے اپنے بیان میں کہا کہ اماریلا کے ریمارکس ناقابلِ قبول، قابلِ مذمت اور قانوناً قابلِ سزا ہیں۔ فیڈریشن کے مطابق معاملہ سرکاری پراسیکیوٹر کے حوالے کیا جا رہا ہے تاکہ قانونی کارروائی عمل میں لائی جا سکے۔ فیڈریشن نے مزید کہا کہ فرانسیسی قومی ٹیم فرانس کی نمائندگی کرتی ہے، لہٰذا ایسے بیانات پورے ملک کی توہین کے مترادف ہیں۔
دوسری جانب پیراگوئے کی حکومت نے بھی سینیٹر کے بیانات سے لاتعلقی کا اظہار کرتے ہوئے ان کی سخت مذمت کی ہے۔ حکومتی بیان میں کہا گیا کہ یہ تبصرے انسانی وقار، باہمی احترام اور پرامن بقائے باہمی کے ان اصولوں کے خلاف ہیں جن کی پیراگوئے ہمیشہ حمایت کرتا ہے۔
فرانس کے صدر ایمانوئل میکرون نے بھی ایمباپے کی حمایت کرتے ہوئے کہا کہ "کیلیان ایمباپے نے اس بار نسل پرستی کے خلاف ایک اور گول کیا ہے۔ جب نفرت انگیز الفاظ سامنے آتے ہیں تو وقار، احترام اور اخوت ہماری طاقت بنتے ہیں۔"
یہ پہلا موقع نہیں کہ فرانسیسی ٹیم کو اس نوعیت کے نسل پرستانہ بیانات کا سامنا کرنا پڑا ہو۔ اس سے قبل پیراگوئے کے سابق لیجنڈری گول کیپر خوسے لوئس چیلاورٹ نے بھی فرانس کے خلاف میچ سے پہلے فرانسیسی ٹیم کو "افریقہ کی ٹیم" قرار دیا تھا، جس پر فرانسیسی فٹبال فیڈریشن کے صدر فلپ دیالو نے سخت ردِعمل دیتے ہوئے انہیں "باعثِ شرم" قرار دیا تھا۔
مزید پڑھیں: آسٹریلیا نے انگلینڈ کو شکست دے کر ساتواں ویمنز ٹی20 ورلڈ کپ جیت لیا
ادھر ورلڈ کپ میں کیلیان ایمباپے کی شاندار فارم بھی برقرار ہے۔ انہوں نے پیراگوئے کے خلاف میچ میں فیصلہ کن پنالٹی گول اسکور کر کے فرانس کو کوارٹر فائنل میں پہنچایا، جہاں اب اس کا مقابلہ مراکش سے ہوگا۔ ایمباپے اب تک سات گول کر چکے ہیں اور وہ ارجنٹینا کے لیونل میسی اور ناروے کے ایرلنگ ہالینڈ کے ساتھ مشترکہ طور پر ٹورنامنٹ کے ٹاپ اسکورر ہیں۔
