برطانوی میڈیا نے ایرانی سرکاری میڈیا کے حوالے سے رپورٹ کیا ہے کہ امریکا نے ایرانی فٹ بال ٹیم کے کھلاڑیوں اور ٹیکنیکل اسٹاف کو ویزے جاری کر دیے ہیں، تاہم ورلڈ کپ کے لیے ایرانی فٹبال ٹیم کی انتظامیہ اور منیجمنٹ سے وابستہ افراد کو تاحال ویزے جاری نہیں کیے گئے۔

ایرانی میڈیا کے مطابق جن افراد کو ویزے نہیں ملے، وہ ٹیم کے انتظامی امور میں انتہائی اہم کردار رکھتے ہیں۔

رپورٹ کے مطابق ایران فٹبال فیڈریشن کے صدر مہدی تاج، ٹیم منیجر، میڈیا آفیسر، سکیورٹی حکام اور وزارتِ خارجہ کے بعض نمائندوں کو امریکی ویزے جاری نہیں کیے گئے۔

ایرانی حکام نے اس معاملے پر فیفا سے مداخلت کا مطالبہ کرتے ہوئے کہا ہے کہ عالمی فٹبال تنظیم اس مسئلے کے حل کے لیے اپنا کردار ادا کرے۔

واضح رہے کہ گزشتہ روز امریکا نے تصدیق کی تھی کہ ایرانی کھلاڑیوں کو آئندہ ورلڈ کپ میں شرکت کے لیے امریکا آنے کی اجازت دے دی گئی ہے۔ امریکی حکام کے مطابق ایرانی کھلاڑیوں اور ضروری معاون عملے کو ویزے جاری کر دیے گئے ہیں۔

دوسری جانب ایرانی فٹ بال ٹیم ورلڈ کپ 2026 میں شرکت کے لیے میکسیکو روانہ ہو چکی ہے۔

ایرانی ٹیم اپنے گروپ مرحلے کا پہلا میچ 15 جون کو نیوزی لینڈ کے خلاف لاس اینجلس میں کھیلے گی، جب کہ اسی شہر میں اس کا مقابلہ بیلجیئم سے بھی ہوگا۔