دنیا کے مختلف ممالک میں روبوٹس بنانے اور انہیں مختلف شعبوں میں استعمال کرنے کے لیے جدید ٹیکنالوجی پر کام کیا جا رہا ہے، جن میں چین نمایاں حیثیت رکھتا ہے۔

 چین میں روبوٹس کو نہ صرف صنعتی اور طبی شعبوں میں بلکہ تفریحی سرگرمیوں میں بھی استعمال کیا جا رہا ہے۔

سوشل میڈیا پر اس سے قبل بھی روبوٹس کی متعدد ویڈیوز وائرل ہو چکی ہیں، تاہم حال ہی میں سامنے آنے والی ایک ویڈیو نے دیکھنے والوں کو دنگ کر دیا ہے۔

وائرل ویڈیو میں دیکھا جا سکتا ہے کہ ایک کانسرٹ کے دوران چھ انسان نما روبوٹس موسیقی کی دھن پر باقاعدہ ڈانس پرفارمنس دے رہے ہیں، جب کہ ان کے ساتھ اسٹیج پر موجود گلوکار بھی روبوٹس کے ساتھ ہم آہنگ ہو کر رقص کرتا نظر آ رہا ہے۔

روبوٹس کی حرکات، قدموں کی ہم آہنگی اور موسیقی کے ساتھ تال میل نے ناظرین کو حیرت میں مبتلا کر دیا، جس سے یہ اندازہ لگایا جا سکتا ہے کہ چین روبوٹکس ٹیکنالوجی میں کس قدر ترقی کر چکا ہے۔

سوشل میڈیا پر وائرل ہونے والی اس ویڈیو پر صارفین کی جانب سے حیرت اور دلچسپی کا اظہار کیا جا رہا ہے، جہاں کچھ صارفین اسے مستقبل کی جھلک قرار دے رہے ہیں، تو کچھ نے روبوٹس کی اس مہارت کو ٹیکنالوجی کا ایک بڑا سنگ میل قرار دیا ہے۔