تفصیلات کے مطابق سیکیورٹی ذرائع نے یہ واضح نہیں کیا کہ یہ ڈرون کہاں سے آئے تھے اور ان کا ہدف کیا تھا۔ تاہم ذرائع کا کہنا ہے کہ یہ دونوں عام ڈرونز تھے جنہیں الیکٹرانک آلات کی مدد سے ناکارہ بنا دیا گیا۔

دوسری جانب افغان طالبان کی وزارتِ دفاع نے دعویٰ کیا ہے کہ افغان فورسز نے جمعہ کی شام فیض آباد کے قریب واقع اہم فوجی تنصیب ’حمزہ کیمپ‘ کو نشانہ بنایاگیا۔

افغان وزارتِ دفاع کی جانب سے سوشل میڈیا پلیٹ فارم ایکس پر جاری بیان میں کہا گیا ہے کہ ڈرونز کے ذریعے وہاں موجود کمانڈ سینٹر اور دیگر اہم تنصیبات کو نشانہ بنایا گیا، جس کے نتیجے میں کافی نقصان ہوا۔

اس سے قبل اسلام آباد پولیس نے بتایا تھا کہ جمعہ کی شام شہر کے سیکٹر آئی نائن میں ایک ڈرون گرنے کی اطلاع ملنے کے بعد علاقے کی ناکہ بندی کر دی گئی ہے۔

ڈی ایس پی انڈسٹریل ایریا سرفراز بٹ کے مطابق ڈرون گرنے کی اطلاع ملنے کے بعد پولیس علاقے میں ضروری کارروائی کر رہی ہے۔ تاہم ڈرون گرنے سے ہونے والے ممکنہ نقصان کے بارے میں حکام نے تاحال کوئی تفصیلات فراہم نہیں کیں۔

اسی دوران اسلام آباد کے بین الاقوامی ہوائی اڈے پر کچھ دیر کے لیے فضائی آپریشن بھی معطل رہا۔ سول ایوی ایشن اتھارٹی کے مطابق آپریشنل وجوہات کی بنا پر کچھ وقت کے لیے فلائٹ آپریشنز میں معمولی رد و بدل کیا گیا تھا، تاہم اب ایئرپورٹ پر تمام پروازیں معمول کے مطابق چل رہی ہیں۔

یاد رہے کہ جمعہ کے روز پاکستان میں ڈرون گرنے کا یہ دوسرا واقعہ ہے۔ اس سے قبل جمعہ کی صبح افغان طالبان حکومت کی وزارتِ دفاع نے ایک بیان میں خیبرپختونخوا کے شہر کوہاٹ میں فوجی چھاؤنی کو ڈرونز کے ذریعے نشانہ بنانے کا دعویٰ کیا تھا۔