ملاقات کے دوران مغربی ایشیا میں جاری کشیدگی، خطے میں قیامِ امن کے لیے پاکستان کی سفارتی کوششوں اور اقوام متحدہ کے امن مشنز میں پاکستان کی طویل خدمات پر بھی گفتگو ہوئی۔

اس موقع پر محسن نقوی نے کہا کہ پاکستان نے ہمیشہ خطے میں امن، استحکام اور انسانی جانوں کے تحفظ کے لیے ذمہ دارانہ کردار ادا کیا ہے،  فیلڈ مارشل سید عاصم منیر اور وزیراعظم شہباز شریف کی قیادت میں پاکستان نے علاقائی امن کے فروغ کے لیے مؤثر سفارتی اقدامات کیے ہیں۔

وفاقی وزیر داخلہ نے اس بات پر بھی زور دیا کہ اقوام متحدہ کے امن مشنز کو مؤثر بنانے کے لیے واضح مینڈیٹ اور ضروری وسائل کی فراہمی انتہائی اہم ہے تاکہ امن دستے اپنی ذمہ داریاں بہتر انداز میں انجام دے سکیں۔

اقوام متحدہ کے سیکرٹری جنرل انتونیو گوتریس نے عالمی امن کے فروغ میں پاکستان کے مسلسل کردار کو سراہتے ہوئے کہا کہ اقوام متحدہ کے امن مشنز میں پاکستان کی خدمات قابلِ قدر ہیں۔ انہوں نے خطے میں کشیدگی کم کرنے اور سفارتی ذرائع سے امن کے قیام کے لیے پاکستان کی حالیہ کوششوں کو بھی قابلِ تحسین قرار دیا۔