تقریب میں پاکستانی ڈیزائنرز ماہین خان، معظّم عباسی، عائشہ طارق، رضوان اللہ اور زین ہاشمی نے اپنے خصوصی کلیکشن پیش کیے، جو پاکستانی اور چینی فیشن کے حسین ملاپ کی نمائندگی کرتے تھے۔

 ماڈلز نے روایتی اجرک کے نقوش اور پھولوں کے ڈیزائن سے مزین ملبوسات زیب تن کیے، جنہوں نے دونوں ثقافتوں کے رنگوں کو خوبصورتی سے اُجاگر کیا۔

چین میں مقیم پاکستانی ڈیزائنر عقیل چوہدری نے اپنے زیورات کا کلیکشن پیش کیا، جب کہ معروف چینی ڈیزائنر لیانگ سُو یون کے تخلیقی ملبوسات نے فیشن شو کو مزید رنگین بنا دیا۔

تقریب میں چین کے اعلیٰ سرکاری حکام، سفارت کار، میڈیا نمائندگان اور کاروباری شخصیات کی بڑی تعداد نے شرکت کی۔

پاکستانی سفیر خلیل ہاشمی نے تقریب سے خطاب کرتے ہوئے کہا کہ عظیم بادالنگ دیوارِ چین فیشن شو کے لیے ایک شاندار مقام ہے، جو شاہراہِ ریشم کے تاریخی تعلق کو جدید انداز میں منانے کی علامت ہے۔

انہوں نے کہا کہ یہ موقع اس لحاظ سے بھی اہم ہے کہ رواں سال پاکستان کے سابق صدر ایوب خان کے دیوارِ چین کے بادالنگ حصے کے تاریخی دورے کی 60ویں سالگرہ ہے، جو کسی پاکستانی رہنما کا پہلا دورہ تھا۔

سفیر خلیل ہاشمی نے مزید کہا کہ یہ فیشن شو تخلیقی امتزاج، تجارتی وژن اور پاکستانی فیشن کی طاقت کا مظہر ہے، جو پاکستان اور چین کے درمیان ثقافتی و تجارتی تعلقات کے نئے در وا کر رہا ہے۔

چائنا انٹرنیشنل کلچرل کمیونیکیشن سینٹر کے چیئرمین لونگ یوشیانگ نے اس موقع پر کہا کہ یہ فیشن شو چین اور پاکستان کے درمیان ثقافتی تعاون اور ہمہ موسمی اسٹریٹیجک شراکت داری کو عوامی سطح پر مزید مضبوط بنانے کی بہترین مثال ہے۔

انہوں نے کہا کہ دونوں ممالک کی گہری تہذیبی وراثت اور خوبصورت زندگی کے مشترکہ خواب اب فیشن کی زبان میں ایک نئی شکل اختیار کر رہے ہیں۔

لونگ یوشیانگ نے امید ظاہر کی کہ دونوں ممالک کے ڈیزائنرز روایتی جمالیات کو جدید انداز میں پیش کر کے فیشن کی دنیا میں نئی توانائی اور جدت پیدا کریں گے۔