اچانک مقبولیت کے باعث ایپ بنانے والوں نے سبسکرپشن فیس متعارف کرانے اور عالمی صارفین کے لیے نام تبدیل کرنے کا اعلان کیا ہے۔
یہ ایپ چینی زبان میں “سائلمے” کے نام سے جانی جاتی ہے، جس کا مطلب ہے “کیا آپ مر گئے ہیں”۔ ایپ خود کو اکیلے رہنے والوں کے لیے ایک سادہ حفاظتی ٹول قرار دیتی ہے۔ ڈویلپمنٹ ٹیم کے مطابق یہ طلبہ، اکیلے رہنے والے دفتری ملازمین اور تنہا طرزِ زندگی اختیار کرنے والے افراد کے لیے بنائی گئی ہے۔ صارف کو ایک ایمرجنسی رابطہ نمبر درج کرنا ہوتا ہے اور اگر صارف مسلسل چند دن ایپ میں چیک اِن نہ کرے تو خودکار الرٹس بھیج دیے جاتے ہیں۔
ریاستی اخبار گلوبل ٹائمز کے مطابق چین میں ایک فرد پر مشتمل گھروں کی تعداد 20 کروڑ تک ہو سکتی ہے اور اکیلے رہنے والوں کا تناسب 30 فیصد سے زائد ہے۔ ایپ کی تیزی سے بڑھتی مقبولیت کو اکیلے رہنے والے افراد میں تحفظ اور تنہائی کے بڑھتے خدشات کا عکاس قرار دیا جا رہا ہے۔
منگل کے روز اپنے سرکاری ویبو اکاؤنٹ پر ویبو سائلمے نے اعلان کیا کہ آنے والے ورژن میں ایپ کو عالمی نام “ڈیمومو” دیا جائے گا۔ ایپ پہلے ہی ایپل ایپ اسٹور پر “ڈیمومو” کے نام سے دستیاب ہے، جہاں یہ رواں ہفتے مختصر وقت کے لیے سرفہرست رہنے کے بعد اس وقت بامعاوضہ ایپس میں دوسرے نمبر پر موجود ہے۔
ڈویلپرز کے مطابق ایپ تین بانیوں نے تیار کی ہے جن کی پیدائش 1995 کے بعد ہوئی اور وہ اسے خود ہی چلا رہے ہیں۔ اتوار کے روز ٹیم نے اعلان کیا کہ بڑھتے آپریشنل اخراجات پورے کرنے کے لیے آٹھ یوان، جو تقریباً ایک ڈالر پندرہ سینٹ بنتے ہیں، کی فیس متعارف کرائی جائے گی۔ ایپل ایپ اسٹور پر ڈیمومو اس وقت آٹھ ہانگ کانگ ڈالر میں دستیاب ہے۔
ایپ کے نام کی تبدیلی پر آن لائن ملے جلے ردعمل سامنے آئے ہیں۔ کچھ صارفین نے پرانا نام برقرار رکھنے کا مطالبہ کیا، جبکہ بعض نے متبادل نام جیسے “کیا آپ زندہ ہیں”، “کیا آپ آن لائن ہیں” یا “کیا آپ موجود ہیں” تجویز کیے۔
ایک صارف نے لکھا کہ اگرچہ یہ نام قدامت پسند افراد کے لیے قابلِ قبول نہ ہو، تاہم ایپ ایک اہم حفاظتی ضرورت پوری کرتی ہے۔ ایک اور صارف کے مطابق یہ ایپ اکیلے اور غیر شادی شدہ افراد کو روزمرہ زندگی میں زیادہ اطمینان فراہم کرتی ہے۔
