یہ اقدام اس تشویش کے پیشِ نظر کیا گیا کہ پاکستان ہر سال بڑی تعداد میں آئی سی ٹی گریجویٹس تیار کرنے کے باوجود مہارتوں کے غیر یکساں معیار اور مارکیٹ کی ضروریات سے محدود ہم آہنگی کے باعث آجروں کے اعتماد اور اعلیٰ قدر والی آئی ٹی برآمدات کی ترقی میں مشکلات کا سامنا کر رہا تھا۔

وزیراعظم کی ہدایات پر نومبر 2025 میں ایک کثیرالجہتی اسٹیئرنگ کمیٹی تشکیل دی گئی تاکہ این ایس سی ٹی کی منصوبہ بندی اور نفاذ کی نگرانی کی جا سکے۔

اس کمیٹی میں ہائر ایجوکیشن کمیشن ، وزارتِ انفارمیشن ٹیکنالوجی و ٹیلی کمیونیکیشن ، پاکستان سافٹ ویئر ایکسپورٹ بورڈ،  پاشا، نیشنل کمپیوٹنگ ایجوکیشن ایکریڈیٹیشن کونسل ، اور ورچوئل یونیورسٹی کے نمائندے شامل تھے۔

کمیٹی نے ملک گیر سطح پر ایک مربوط کوشش کے ذریعے اس قابلیت پر مبنی ٹیسٹنگ فریم ورک کو عملی شکل دی۔ 

این ایس سی ٹی  کو ایک معیاری امتحان  نظام کے طور پر ڈیزائن کیا گیا تاکہ گریجویٹس کی صلاحیتوں کو انڈسٹری سے ہم آہنگ مہارتوں کے مطابق جانچا جا سکے اور تکنیکی مہارتوں کی معروضی تصدیق فراہم کی جا سکے۔

اس اقدام کا مقصد کمپیوٹنگ تعلیم کے جائزوں کی ساکھ بہتر بنانا، صنعت اور تعلیمی اداروں کے درمیان تعاون کو مضبوط کرنا، اور گریجویٹس کے لیے روزگار کے مواقع بڑھانا ہے۔

امتحان کے لیے ایک مہارتی فریم ورک پاشا کے تعاون سے تیار کیا گیا تاکہ بدلتی ہوئی صنعتی ضروریات سے ہم آہنگی برقرار رکھی جا سکے۔

سرکاری تفصیلات کے مطابق این ایس سی ٹی  اپریل 2026 میں کامیابی کے ساتھ ملک بھر میں ورچوئل یونیورسٹی کے پلیٹ فارم کے ذریعے کمپیوٹرائزڈ امتحان کی صورت میں منعقد کیا گیا۔

اس اقدام میں 190 سے زائد جامعات نے حصہ لیا، جبکہ 112 شہروں میں قائم 165 مراکز پر امتحانات لیے گئے۔

کل 40,784 طلبہ نے رجسٹریشن کروائی، جن میں سے 33,038 امیدوار امتحان میں شریک ہوئے، یوں حاضری کی شرح 81 فیصد رہی۔

امتحان روزانہ چار سیشنز میں صبح 9 بجے سے شام 4:30 بجے تک منعقد کیا گیا۔ اس میں 100 سوالات شامل تھے اور دورانیہ 120 منٹ رکھا گیا تھا۔

نگرانی کے انتظامات میں HEC، MoITT، بطور تھرڈ پارٹی ویلیڈیٹر PAS، اور پاشا شامل تھے۔

حکام کے مطابق اس اقدام سے کمپیوٹر سائنس اور آئی ٹی پروگرامز کے معیار جانچنے کے لیے قابلِ اعتماد قومی سطح کا ڈیٹا حاصل ہوا، صنعت کے لیے تصدیق شدہ قومی آئی ٹی ٹیلنٹ پول قائم ہوا، اور تعلیمی اداروں اور صنعت کے درمیان روابط مزید مضبوط ہوئے۔

اس امتحان نے نصاب میں بہتری، آؤٹ کم بیسڈ ایجوکیشن، اور ادارہ جاتی کارکردگی کے جائزے کے لیے قابلِ عمل معلومات بھی فراہم کیں، جبکہ مستقبل میں کارکردگی کی بنیاد پر فنڈنگ کے نظام کی بنیاد بھی رکھی گئی۔

حکام کے مطابق طویل المدتی اثرات میں پاکستانی آئی ٹی ٹیلنٹ پر عالمی اعتماد میں اضافہ، مصنوعی ذہانت (AI)، سائبر سیکیورٹی، کلاؤڈ کمپیوٹنگ، اور ڈیٹا سائنس جیسے جدید شعبوں میں زیادہ شرکت، اور پاکستان کی آئی ٹی برآمدات میں اضافے کی توقع شامل ہے۔