تازہ سرکاری نوٹیفکیشن کے مطابق پیٹرول پر صارفین سے وصول کی جانے والی پیٹرولیم لیوی 65 روپے 29 پیسے سے کم ہو کر 63 روپے 64 پیسے فی لیٹر رہ گئی ہے۔ یعنی صارفین کے حصے میں مزید ایک روپے 65 پیسے کی کمی ہوئی ہے۔ تاہم اس کا مطلب یہ نہیں کہ حکومت نے مجموعی لیوی ختم یا کم کر دی ہے۔ مجموعی لیوی 80 روپے فی لیٹر برقرار ہے، جس میں سے اب 16 روپے 36 پیسے ریفائنریز ادا کر رہی ہیں۔
دوسری جانب گزشتہ دنوں پیٹرول کی قیمت میں بھی مسلسل کمی ہوئی ہے۔ 2 نومبر کو پیٹرول 374 روپے 51 پیسے فی لیٹر تھا، جو 13 نومبر سے کم ہو کر 332 روپے فی لیٹر ہو گیا۔ یوں اس عرصے میں قیمت میں 42 روپے 51 پیسے کی کمی ہوئی۔
لیکن سوال یہ ہے کہ اس ریلیف میں جماعتِ اسلامی کی تحریک کا کتنا حصہ ہے اور حکومت نے یہ اقدامات کیوں کیے؟
پیٹرولیم لیوی کا مسئلہ کیا ہے؟
پیٹرولیم لیوی دراصل حکومت کی جانب سے پیٹرولیم مصنوعات پر فی لیٹر عائد کیا جانے والا ٹیکس ہے۔ اس کا تعلق عالمی منڈی میں خام تیل کی قیمت سے براہِ راست نہیں ہوتا، بلکہ حکومت اسے اپنی مالی ضروریات اور بجٹ کے اہداف کے مطابق مقرر کرتی ہے۔
جب عالمی منڈی میں تیل سستا ہوتا ہے تو اس کا فائدہ صارفین تک پہنچانے میں لیوی رکاوٹ بن سکتی ہے، کیونکہ حکومت قیمت میں کمی کے بجائے لیوی برقرار رکھ سکتی ہے یا بڑھا سکتی ہے۔
اس کا ایک بڑا مسئلہ یہ بھی ہے کہ پیٹرول کی قیمت میں اضافے کا اثر صرف گاڑی یا موٹر سائیکل چلانے والوں تک محدود نہیں رہتا۔ ٹرانسپورٹ اور مال برداری مہنگی ہونے سے اشیائے خورونوش سمیت روزمرہ استعمال کی چیزوں کی قیمتیں بھی متاثر ہوتی ہیں۔
جماعتِ اسلامی نے تحریک کب اور کیوں شروع کی؟
جماعتِ اسلامی نے پیٹرولیم لیوی کے خلاف اپنے احتجاج کا سلسلہ اگست 2026 میں شروع کیا۔ 16 اگست سے لاہور، کراچی، پشاور اور دیگر شہروں میں دھرنے اور احتجاجی سرگرمیاں جاری رہیں۔
امیر جماعتِ اسلامی حافظ نعیم الرحمان کا مؤقف تھا کہ حکومت عوام سے پیٹرول پر بھاری ٹیکس وصول کر رہی ہے، جب کہ مہنگائی اور آمدن میں کمی کے باعث عام شہری پہلے ہی مشکلات کا شکار ہیں۔
حافظ نعیم نے پیٹرولیم لیوی کے مکمل خاتمے کا مطالبہ کیا اور مؤقف اختیار کیا کہ حکومت کو اپنے اخراجات کم کرکے عوام کو ریلیف دینا چاہیے۔ اگر لیوی اور بعض دیگر ٹیکس ختم کر دیے جائیں تو پیٹرول کی قیمت میں فی لیٹر 106 روپے تک کمی ممکن ہے۔
جماعتِ اسلامی نے صرف احتجاج پر اکتفا نہیں کیا بلکہ حکومت کو متبادل مالی تجاویز بھی پیش کیں، جن میں سرکاری اخراجات میں کمی، ٹیکس نظام میں تبدیلی اور متبادل ذرائع سے محصولات جمع کرنا شامل تھا۔
حکومت اور جماعتِ اسلامی کے درمیان مذاکرات کیسے آگے بڑھے؟
4 ستمبر کو جماعتِ اسلامی کی ملک گیر شٹر ڈاؤن ہڑتال کے موقع پر حکومت اور جماعتِ اسلامی کے درمیان مذاکرات کا راستہ کھلا۔ دونوں فریقوں نے پیٹرولیم لیوی میں کمی اور عوام کو ریلیف دینے کے لیے الگ الگ کمیٹیاں بنانے پر اتفاق کیا۔
تاہم احتجاج ختم نہیں ہوا۔ جماعتِ اسلامی کا کہنا تھا کہ مذاکرات جاری رہنے کے باوجود اس کی تحریک اس وقت تک جاری رہے گی جب تک مطالبات پر عملی پیش رفت نہیں ہوتی۔
14 ستمبر کو حافظ نعیم الرحمان نے وزیراعظم شہباز شریف کی جانب سے موٹر سائیکلوں، رکشوں اور 800 سی سی تک گاڑیوں کے لیے اعلان کردہ فیول ریلیف اسکیم کو ناکافی قرار دیتے ہوئے لیوی کے مکمل خاتمے کا مطالبہ دہرایا۔
20 ستمبر کو جماعتِ اسلامی نے اسلام آباد کی جانب لانگ مارچ شروع کرنے کا اعلان کیا۔ بعد ازاں وزیراعظم کی درخواست پر 22 ستمبر کو مارچ مؤخر کر دیا گیا، تاہم جماعت نے واضح کیا کہ مطالبات پورے نہ ہونے کی صورت میں احتجاج دوبارہ شروع کیا جا سکتا ہے۔
اکتوبر میں وزیراعظم شہباز شریف اور حافظ نعیم الرحمان کی ملاقات کے بعد دونوں جانب سے ایک مشترکہ کمیٹی بنانے پر اتفاق ہوا۔ اس کمیٹی کو فیول ریلیف اسکیم میں توسیع اور آئندہ بجٹ میں پیٹرولیم لیوی مرحلہ وار کم کرنے کی تجاویز پر کام کرنا تھا۔
3 نومبر کو مذاکرات میں جماعتِ اسلامی نے عوام کو ریلیف دینے کے لیے چھ تجاویز پیش کیں۔ ان میں پیٹرولیم لیوی کا خاتمہ، فیول ریلیف پیکیج، پبلک ٹرانسپورٹ کے کرایوں میں کمی اور 800 سی سی سے بڑی گاڑیوں اور زرعی شعبے کو ریلیف دینا شامل تھا۔
10 نومبر کو مذاکرات کا دسواں دور ہوا، جس کے بعد جماعتِ اسلامی کے نائب امیر لیاقت بلوچ نے کہا کہ دونوں فریق مجوزہ معاہدے کے بنیادی نکات پر متفق ہو گئے ہیں۔ تاہم حتمی فیصلے اور عملی اقدامات کا انتظار باقی ہے۔
حکومت پیٹرولیم لیوی ختم کرنے سے کیوں گریزاں ہے؟
اس کی سب سے بڑی وجہ حکومت کی مالی ضروریات اور عالمی مالیاتی فنڈ (آئی ایم ایف) کے ساتھ طے شدہ مالی اہداف ہیں۔
حکومت پیٹرولیم لیوی کو محصولات جمع کرنے کا ایک اہم ذریعہ سمجھتی ہے۔ مالی سال 2026-27 کے لیے اس مد میں تقریباً ایک ہزار 676 ارب روپے جمع کرنے کا ہدف مقرر کیا گیا ہے۔
اگر حکومت یہ لیوی مکمل طور پر ختم کر دے تو اسے قومی خزانے کے لیے متبادل آمدن کا انتظام کرنا ہوگا۔ اسی لیے حکومت فوری خاتمے کے بجائے مرحلہ وار کمی اور مخصوص طبقوں کے لیے ریلیف کی پالیسی پر زور دیتی رہی ہے۔
جماعتِ اسلامی نے اس کے جواب میں تجویز دی کہ لیوی کو بتدریج کم کرکے پانچ سے دس روپے فی لیٹر تک لایا جائے اور اس سے ہونے والی آمدن کی کمی دوسرے ٹیکس اقدامات، سرکاری اخراجات میں بچت اور ٹیکس چھوٹ ختم کرکے پوری کی جائے۔
ستمبر میں بزنس ریکارڈر نے رپورٹ کیا تھا کہ حکومت جماعتِ اسلامی کی اس تجویز کا جائزہ لے رہی ہے، جس کے تحت تقریباً ایک ہزار 450 سے ایک ہزار 500 ارب روپے کی سالانہ آمدن کے متبادل ذرائع تلاش کیے جا سکتے ہیں۔
اب تک عوام کو کتنا ریلیف ملا؟
یہاں دو مختلف معاملات کو سمجھنا ضروری ہے۔ پہلا، پیٹرول کی مجموعی قیمت میں کمی ہے۔ 2 نومبر کو پیٹرول 374 روپے 51 پیسے فی لیٹر تھا، جب کہ 13 نومبر سے اس کی قیمت 332 روپے مقرر کی گئی۔ اس طرح قیمت میں 42 روپے 51 پیسے کمی ہوئی۔ یہ کمی عالمی منڈی کے حالات، قیمتوں کے نئے طریقہ کار اور دیگر حکومتی اقدامات کے مجموعی اثرات کے تحت ہوئی۔
دوسرا پیٹرولیم لیوی کا صارفین پر براہِ راست بوجھ ہے۔ 31 اکتوبر سے نافذ حکومتی طریقہ کار کے تحت پیٹرول پر 65 روپے 29 پیسے صارفین کے حصے میں رکھے گئے، جب کہ 14 روپے 71 پیسے ریفائنریز کے ذریعے ادا کیے جانے تھے۔
بعد ازاں 12 نومبر سے نافذ نوٹیفکیشن کے مطابق صارفین کا حصہ مزید کم کرکے 63 روپے 64 پیسے کر دیا گیا، جب کہ ریفائنریز کا حصہ بڑھا کر 16 روپے 36 پیسے کر دیا گیا۔ اس طرح مجموعی لیوی 80 روپے فی لیٹر برقرار رہی۔
جماعتِ اسلامی کا دعویٰ ہے کہ اس کی احتجاجی تحریک کے نتیجے میں پیٹرول پر 120 روپے اور ڈیزل پر 146 روپے فی لیٹر ریلیف حاصل ہوا ہے۔ تاہم یہ اعداد جماعتِ اسلامی کے اپنے دعوے ہیں؛ انہیں صرف پیٹرولیم لیوی میں کمی یا صرف احتجاج کا نتیجہ قرار نہیں دیا جا سکتا۔
پیٹرول کی قیمتوں میں کمی کا نیا طریقہ کیا ہے؟
حکومت نے اکتوبر کے آخر میں پیٹرول کی قیمت مقرر کرنے کا طریقہ بھی تبدیل کیا۔ اس فیصلے کے تحت مقامی ریفائنریز کے لیے پیٹرول کی قیمت میں جنگ سے پہلے، یعنی 7 مارچ 2026 کے پریمیم، کسٹمز ڈیوٹی اور دیگر اخراجات کی سطح کو بنیاد بنایا گیا۔
اس سے پہلے عالمی کشیدگی کے باعث درآمدی پیٹرول کی قیمت میں شامل پریمیم اور دیگر اخراجات بڑھ گئے تھے، جن کا اثر مقامی ریفائنریز کے تیار کردہ پیٹرول کی قیمت پر بھی پڑ رہا تھا۔
نئے طریقہ کار کے تحت درآمدی قیمت اور مقررہ مقامی قیمت کے درمیان فرق ریفائنریز کو پیٹرولیم لیوی کی مد میں جمع کرانا ہے۔ حکومت کے مطابق اس اقدام سے صارفین کو فی لیٹر 14 روپے 71 پیسے کا ریلیف ملا۔ یہ انتظام ابتدائی طور پر 30 دن کے لیے کیا گیا تھا۔
آگے کیا ہو سکتا ہے؟
10 نومبر کے مذاکرات میں دونوں فریقوں کے درمیان مجوزہ معاہدے کے بنیادی نکات پر اتفاق کی بات سامنے آئی، لیکن پیٹرولیم لیوی کے مکمل خاتمے یا اس میں مزید کمی کا حتمی فیصلہ ابھی باقی ہے۔
حکومت کو ایک طرف عوام کو ریلیف دینا ہے اور دوسری طرف بجٹ اور آئی ایم ایف پروگرام کے تحت محصولات کے اہداف بھی پورے کرنے ہیں۔ جماعتِ اسلامی کا مطالبہ ہے کہ حکومت متبادل ذرائع سے آمدن حاصل کرکے پیٹرولیم لیوی ختم کرے، جب کہ حکومت مرحلہ وار کمی اور مخصوص ریلیف اسکیموں کو قابلِ عمل راستہ سمجھتی ہے۔
اس لیے آنے والے دنوں میں اصل سوال یہ ہوگا کہ مذاکرات کسی حتمی معاہدے تک پہنچتے ہیں یا نہیں، اور کیا حکومت واقعی پیٹرولیم لیوی میں مزید کمی کرتی ہے؟
فی الحال پیٹرول کی قیمت میں 42 روپے سے زائد کمی اور صارفین کے ذمے لیوی میں ایک روپے 65 پیسے کی مزید کمی سامنے آ چکی ہے، لیکن مجموعی پیٹرولیم لیوی اب بھی 80 روپے فی لیٹر ہے۔ یوں جماعتِ اسلامی کا بنیادی مطالبہ، یعنی لیوی کا مکمل خاتمہ، ابھی پورا نہیں ہوا۔
