پاکستان منرلز انویسٹمنٹ فورم 2026 سے خطاب کرتے ہوئے فیلڈ مارشل عاصم منیر نے کہا کہ پاکستان کی معدنی دولت کو مؤثر انداز میں استعمال کرنا ایک مشترکہ قومی مقصد ہے۔ ملک میں قدرتی وسائل کے وسیع امکانات موجود ہیں، جنہیں بروئے کار لاکر معیشت کو مضبوط بنانے اور صنعتی ترقی کی نئی راہیں کھولی جا سکتی ہیں۔ ان کا کہنا تھا کہ معدنی شعبے کی ترقی کے لیے سرمایہ کاری کے ساتھ ساتھ پائیدار منصوبہ بندی اور مربوط حکمت عملی بھی ضروری ہے۔
انہوں نے واضح کیا کہ پاکستان کی ترجیح صرف خام معدنیات نکال کر بیرون ملک برآمد کرنا نہیں بلکہ ملک کے اندر ہی ان کی پراسیسنگ، ریفائننگ اور مینوفیکچرنگ کے مراحل کو فروغ دینا ہے۔ اس مقصد کے تحت معدنیات کی پوری ویلیو چین کو ترقی دینے پر توجہ مرکوز کی جا رہی ہے، تاکہ قدرتی وسائل سے حاصل ہونے والی معاشی قدر کا زیادہ حصہ پاکستان میں ہی پیدا ہو اور مقامی صنعت کو بھی ترقی کے مواقع میسر آئیں۔
فیلڈ مارشل عاصم منیر کا کہنا تھا کہ پاکستان عالمی سرمایہ کاروں اور شراکت داروں کے ساتھ طویل المدتی تعاون کا خواہاں ہے۔ ایسی شراکت داریاں قائم کرنا ضروری ہیں جن سے نہ صرف پاکستان بلکہ بین الاقوامی سرمایہ کاروں کو بھی مستقل اور پائیدار معاشی فوائد حاصل ہوں۔ ان کے مطابق معدنی شعبے میں سرمایہ کاری کے لیے سازگار ماحول، محفوظ کاروباری سرگرمیاں اور منصوبوں کا تسلسل بنیادی اہمیت رکھتے ہیں۔
چیف آف ڈیفنس فورسز نے کہا کہ کان کنی کے پورے نظام کی سیکیورٹی یقینی بنانے کے لیے ہر ممکن اقدام کیا جا رہا ہے اور یہ سلسلہ آئندہ بھی جاری رہے گا۔ کانوں اور کان کنوں کے علاوہ سرمایہ کاری، صنعتی منصوبوں اور ان سے منسلک تمام افراد کو تحفظ فراہم کرنا حکومت اور متعلقہ اداروں کی ترجیحات میں شامل ہے، محفوظ ماحول کے بغیر معدنی شعبے میں بڑے پیمانے پر سرمایہ کاری اور طویل المدتی منصوبوں کو آگے بڑھانا ممکن نہیں۔
انہوں نے اس بات پر بھی زور دیا کہ معدنی وسائل سے حاصل ہونے والے فوائد صرف بڑے منصوبوں یا سرمایہ کاروں تک محدود نہیں رہنے چاہئیں بلکہ ان کا براہِ راست فائدہ متعلقہ علاقوں کی آبادیوں تک پہنچنا چاہیے۔ معدنیات سے مالا مال علاقوں کے رہائشیوں کو روزگار، معاشی مواقع اور بنیادی سہولتوں کی صورت میں اپنی زندگیوں میں واضح بہتری محسوس ہونی چاہیے۔ ان کے مطابق مقامی آبادیوں کی شمولیت اور ترقی معدنی منصوبوں کی پائیداری کے لیے بھی اہم ہے۔
فیلڈ مارشل عاصم منیر نے پاکستانی عوام کی صلاحیتوں پر اعتماد کا اظہار کرتے ہوئے کہا کہ ملک کے عوام محنتی، بہادر اور پُرعزم ہیں اور ان میں بڑے سے بڑے اہداف حاصل کرنے کی صلاحیت موجود ہے۔ قدرتی وسائل ملک کے لیے مواقع فراہم کرتے ہیں، تاہم ان مواقع کو عملی کامیابی میں تبدیل کرنے کے لیے انسانی صلاحیت، محنت اور قومی عزم بنیادی کردار ادا کرتے ہیں۔
انہوں نے کہا کہ اب پاکستان کو اپنی حکمت عملی میں عملی تبدیلی لانا ہوگی۔ ملک کو صرف دستیاب صلاحیتوں اور وسائل پر انحصار کرنے کے بجائے انہیں پیداوار میں تبدیل کرنا ہوگا، وعدوں کو عملی اقدامات میں بدلنا ہوگا اور خام معدنیات کی برآمد سے آگے بڑھ کر ویلیو ایڈڈ مصنوعات کی تیاری پر توجہ دینا ہوگی۔
ان کا کہنا تھا کہ معدنی شعبے میں سرمایہ کاری، جدید ٹیکنالوجی کے استعمال، مقامی صنعت کے فروغ اور عالمی شراکت داریوں کے ذریعے پاکستان کے لیے معاشی ترقی کے نئے امکانات پیدا کیے جا سکتے ہیں۔ حکومت اور متعلقہ اداروں کی کوشش ہے کہ ملک کے معدنی وسائل کو قومی ترقی، صنعتی خودکفالت اور پائیدار معاشی استحکام کے لیے مؤثر انداز میں بروئے کار لایا جائے۔
