پاکستان نے بھارتی طیاروں کے لیے اپنی فضائی حدود کی بندش میں مزید توسیع کر دی ہے۔ پاکستان ائیرپورٹ اتھارٹی (پی اے اے) نے نوٹم جاری کرتے ہوئے واضح کیا ہے کہ پابندی 24 فروری کی صبح 5 بجے تک برقرار رہے گی۔ اس پابندی کا اطلاق نہ صرف بھارتی ملکیت یا لیز پر آپریٹ کیے جانے والے تجارتی طیاروں پر ہوگا بلکہ بھارتی فوج کی پروازوں پر بھی مکمل طور پر لاگو ہوگا۔
پی اے اے کے ترجمان نے تصدیق کی کہ یہ اقدام اس بات کو یقینی بنانے کے لیے کیا گیا ہے کہ بھارتی ائیرلائنز کی تمام پروازیں پاکستانی فضائی حدود میں داخل نہ ہوں اور دونوں ممالک کے درمیان فضائی آپریشنز پر مکمل کنٹرول برقرار رہے،یہ پابندی گزشتہ اقدامات کی تسلسل ہے، جس کے تحت پاکستان نے پہلے بھی بھارتی طیاروں پر فضائی حدود کی بندش عائد کی تھی، اور اب اسے مزید ایک ماہ کے لیے بڑھایا گیا ہے۔
انہوں نے واضح کیا کہ پابندی بھارتی ملکیت، لیز یا آپریٹ کیے گئے تمام طیاروں پر لاگو ہوگی، چاہے وہ مسافر بردار ہوں یا کارگو، اور اس کے ساتھ ساتھ بھارتی فوج کی پروازیں بھی اس سے مستثنیٰ نہیں ہوں گی۔ اس فیصلے کا مقصد قومی سلامتی اور فضائی حدود کی حفاظت کو یقینی بنانا ہے۔
مزید جانیں: پاک فضائیہ کا دستہ ‘اسپیئرز آف وکٹری 2026’ میں حصہ لینے کے لیے سعودی عرب پہنچ گیا
پاکستانی حکام کا کہنا ہے کہ اس پابندی کے دوران دونوں ممالک کے درمیان فضائی رابطے محدود رہیں گے، جس کے نتیجے میں بھارتی ائیرلائنز کی پروازیں منسوخ یا متبادل راستے اختیار کر سکتی ہیں۔ ماہرین کے مطابق یہ اقدام علاقائی تحفظ اور ملکی فضائی حدود کے تحفظ کی حکمت عملی کا حصہ ہے، خاص طور پر ایسے حالات میں جب دونوں ممالک کے تعلقات میں کشیدگی جاری ہے۔
پاکستانی فضائی حدود میں بھارتی طیاروں پر پابندی کا اطلاق 2019 کے بعد سے مختلف مواقع پر جاری ہے اور یہ اقدام ہمیشہ قومی سلامتی اور علاقائی امن کے تناظر میں کیا گیا ہے۔ حالیہ توسیع کا مقصد بھی یہی ہے کہ غیر متعلقہ یا ممکنہ خطرہ لاحق کرنے والی پروازیں پاکستانی فضائی حدود میں داخل نہ ہو سکیں۔
