حکام کے مطابق یہ کیس ٹیکساس کے علاقے لا پرائر میں ایک تین ہفتے کے بچھڑے میں پایا گیا، جو میکسیکو کی سرحد سے تقریباً 30 میل کے فاصلے پر واقع ہے۔

پیراسائٹ کیا ہے؟

یہ ایک خطرناک مکھی ہے جس کی مادہ کھلے زخموں اور جسم کے نرم حصوں میں انڈے دیتی ہے۔ ان انڈوں سے نکلنے والے لاروے زندہ گوشت کو کھانا شروع کر دیتے ہیں، جس سے متاثرہ جانور کی موت بھی واقع ہو سکتی ہے اگر فوری علاج نہ کیا جائے۔

ماہرین کے مطابق یہ پیراسائٹ مویشیوں کے لیے انتہائی خطرناک ہے، جب کہ شاذ و نادر صورتوں میں انسان اور پالتو جانور بھی متاثر ہو سکتے ہیں، تاہم انسانی خطرہ کم سمجھا جاتا ہے۔

امریکی محکمہ زراعت اور ٹیکساس حکام نے کیس کی تصدیق کے بعد 20 کلومیٹر کا قرنطینہ اور نگرانی کا زون قائم کر دیا ہے تاکہ اس کے پھیلاؤ کو روکا جا سکے۔

اس کے ساتھ ساتھ ایک بڑا منصوبہ بھی زیر غور ہے جس کے تحت لاکھوں جراثیم سے پاک مکھیوں کو ماحول میں چھوڑا جائے گا۔ چونکہ اس مکھی کی مادہ زندگی میں صرف ایک بار ملاپ کرتی ہے، اس لیے غیر زرخیز انڈے اس کے پھیلاؤ کو روک سکتے ہیں۔

امریکی زرعی ماہرین اور کسانوں نے اس پیش رفت پر تشویش ظاہر کی ہے کہ اگر یہ پیراسائٹ پھیل گیا تو مویشیوں کی تعداد میں کمی، گوشت کی پیداوار میں کمی اور قیمتوں میں اضافہ ہو سکتا ہے۔

امریکی وزیر زراعت بروک رولنز نے کسانوں کو یقین دہانی کرائی ہے کہ وفاقی ادارے پہلے ہی جنوبی ٹیکساس میں آپریشنز میں مدد فراہم کر رہے ہیں۔

ٹیکساس کے زرعی کمشنر سِڈ ملر نے وفاقی ردعمل پر تنقید کرتے ہوئے کہا ہے کہ حکومت نے بروقت اور مکمل اقدامات نہیں کیے، جس سے صورتحال مزید سنگین ہو سکتی ہے۔