بہت سے افراد یہ سمجھتے ہیں کہ امریکا میں صرف ایک ہی قسم کا ورک ویزا موجود ہے، حالانکہ حقیقت میں مختلف شعبوں، مہارتوں اور ملازمت کی نوعیت کے مطابق متعدد ورک ویزا کیٹیگریز موجود ہیں۔ کچھ ویزے محدود مدت کے لیے جاری کیے جاتے ہیں، جبکہ بعض مستقل رہائش اور مستقبل میں گرین کارڈ حاصل کرنے کا راستہ بھی فراہم کرتے ہیں۔
عارضی اور مستقل ورک ویزا میں کیا فرق ہے؟
امریکی ورک ویزا بنیادی طور پر دو اقسام میں تقسیم کیے جاتے ہیں: عارضی (Temporary) اور مستقل (Permanent)۔
عارضی ورک ویزا ان افراد کے لیے ہوتا ہے جو ایک مخصوص مدت تک امریکا میں ملازمت کرنا چاہتے ہیں۔ اس ویزے کی مدت ختم ہونے پر انہیں امریکا چھوڑنا ہوتا ہے، الا یہ کہ ان کے قیام میں توسیع یا امیگریشن اسٹیٹس میں تبدیلی کی منظوری مل جائے۔
اس کے برعکس مستقل ورک ویزا ایسے افراد کے لیے ہے جو امریکا میں مستقل رہائش اور ملازمت اختیار کرنا چاہتے ہیں۔ تمام امیگریشن کارروائی مکمل ہونے پر درخواست گزار کو مستقل رہائشی حیثیت (Permanent Residency) مل سکتی ہے اور بعد ازاں گرین کارڈ بھی جاری کیا جاتا ہے۔
عارضی ورک ویزا کی اقسام
امریکا میں عارضی ورک ویزا کی 11 مختلف کیٹیگریز موجود ہیں، جن میں ہر ایک مخصوص پیشے یا شعبے کے لیے مختص ہے۔
H-1B ویزا خصوصی مہارت رکھنے والے پیشہ ور افراد کے لیے ہے، جن کے پاس عموماً کم از کم بیچلر ڈگری یا اس کے مساوی پیشہ ورانہ تجربہ ہونا ضروری ہوتا ہے۔
H-2A ویزا موسمی یا عارضی زرعی کارکنوں کے لیے جبکہ H-2B ویزا موسمی یا عارضی غیر زرعی ملازمین کے لیے جاری کیا جاتا ہے۔
H-3 ویزا ان افراد کو دیا جاتا ہے جو ایسی عملی تربیت حاصل کرنا چاہتے ہوں جو ان کے اپنے ملک میں دستیاب نہ ہو۔
L ویزا ان ملازمین کے لیے مخصوص ہے جنہیں ایک ہی کمپنی اپنی بیرون ملک شاخ سے امریکا کے دفتر میں انتظامی، ایگزیکٹو یا خصوصی مہارت والے عہدے پر منتقل کرتی ہے۔ اس کے لیے ضروری ہے کہ درخواست گزار گزشتہ تین برس کے دوران کم از کم ایک سال اسی کمپنی کے ساتھ بیرون ملک کام کر چکا ہو۔
O ویزا سائنس، تعلیم، فنون، کاروبار یا کھیلوں میں غیر معمولی صلاحیت یا نمایاں کامیابی رکھنے والے افراد کے لیے مخصوص ہے۔
P ویزا کھلاڑیوں، فنکاروں اور تفریحی شعبے سے وابستہ افراد کو مقابلوں، پرفارمنس یا ثقافتی پروگراموں میں شرکت کے لیے دیا جاتا ہے، جبکہ Q-1 ویزا بین الاقوامی ثقافتی تبادلے کے پروگراموں میں شریک افراد کے لیے مختص ہے۔
کیا ملازمت کی پیشکش ضروری ہے؟
زیادہ تر امریکی عارضی ورک ویزا کے لیے کسی امریکی آجر (Employer) کی اسپانسرشپ لازمی ہوتی ہے۔ آجر پہلے امریکی شہریت و امیگریشن سروسز (USCIS) میں درخواست جمع کراتا ہے۔ اس درخواست کی منظوری کے بعد ہی متعلقہ شخص ورک ویزا کے لیے درخواست دے سکتا ہے۔
بعض ویزا کیٹیگریز میں آجر کو پہلے امریکی محکمہ محنت (Department of Labor) سے لیبر سرٹیفکیشن بھی حاصل کرنا پڑتی ہے۔
کن دستاویزات کی ضرورت ہوگی؟
ویزا انٹرویو سے پہلے درخواست گزار کو ضروری دستاویزات تیار رکھنی چاہئیں، جن میں شامل ہیں:
مجوزہ قیام سے کم از کم چھ ماہ زائد مدت تک کارآمد پاسپورٹ
ڈی ایس-160 فارم کی تصدیقی رسید
ویزا فیس کی ادائیگی کا ثبوت (اگر لاگو ہو)
پاسپورٹ سائز تصویر (اگر آن لائن اپ لوڈ نہ کی گئی ہو)
فارم I-129 کی رسید یا USCIS کی منظوری کا نوٹس (فارم I-797)
اگر درخواست L Blanket Petition کے تحت دی جا رہی ہو تو فارم I-129S بھی درکار ہوگا۔ امریکی سفارت خانہ یا قونصل خانہ ضرورت کے مطابق اضافی دستاویزات بھی طلب کر سکتا ہے۔
درخواست دینے کا طریقہ
ورک ویزا حاصل کرنے کے لیے عمومی طور پر درج ذیل مراحل سے گزرنا ہوتا ہے:
آجر کی جانب سے USCIS میں درخواست جمع کرانا
منظوری کے بعد درخواست گزار کا آن لائن DS-160 فارم مکمل کرنا
ویزا فیس ادا کرنا
ویزا انٹرویو کے لیے وقت لینا
تمام ضروری دستاویزات کے ساتھ انٹرویو میں شرکت کرنا
جہاں ضروری ہو بایومیٹرک فنگر پرنٹس جمع کرانا
بعد ازاں ویزا فیصلے کا انتظار کرنا
غیر امیگرنٹ ورک ویزا کی بنیادی درخواست فیس عام طور پر 205 امریکی ڈالر ہوتی ہے، تاہم بعض درخواست گزاروں کو اضافی فیس بھی ادا کرنا پڑ سکتی ہے۔
کیا اہل خانہ بھی ساتھ جا سکتے ہیں؟
زیادہ تر ورک ویزا ہولڈرز کے شریک حیات اور غیر شادی شدہ کم عمر بچے بھی متعلقہ ڈپینڈنٹ ویزا کے ذریعے ان کے ساتھ یا بعد میں امریکا جا سکتے ہیں۔
البتہ Q-1 کلچرل ایکسچینج ویزا اس حوالے سے ایک استثنا ہے۔ اس کے علاوہ درخواست گزار کو یہ بھی ثابت کرنا ہوتا ہے کہ وہ امریکا میں اپنے اہل خانہ کے اخراجات برداشت کرنے کی مالی استطاعت رکھتا ہے۔
ویزا ملنے کے بعد بھی داخلہ یقینی نہیں
ماہرین کے مطابق امریکی ورک ویزا جاری ہونے کا مطلب یہ نہیں کہ امریکا میں داخلہ یقینی ہو گیا ہے۔ حتمی فیصلہ ہوائی اڈے یا دیگر داخلی مقامات پر موجود امریکی کسٹمز اینڈ بارڈر پروٹیکشن (CBP) کے افسران کرتے ہیں، جو تمام دستاویزات اور قانونی تقاضوں کا جائزہ لینے کے بعد داخلے کی اجازت دیتے ہیں۔
مستقل ورک ویزا کیسے مختلف ہے؟
مستقل ورک ویزا ان افراد کے لیے ہوتا ہے جو امریکا میں مستقل رہائش اختیار کرنا چاہتے ہیں۔ روزگار کی بنیاد پر امیگرنٹ ویزا کی پانچ مختلف کیٹیگریز موجود ہیں، جن میں EB-2 اور EB-3 سب سے زیادہ معروف ہیں۔
یہ ویزے اعلیٰ تعلیمی قابلیت رکھنے والے پیشہ ور افراد، ہنر مند کارکنوں اور دیگر اہل ملازمین کے لیے مخصوص ہیں اور ان کے ذریعے مستقبل میں گرین کارڈ حاصل کیا جا سکتا ہے۔
کن صورتوں میں ورک ویزا مسترد ہو سکتا ہے؟
امریکی امیگریشن قوانین کے مطابق USCIS کی جانب سے پٹیشن منظور ہونے کے باوجود ویزا جاری ہونا لازمی نہیں ہوتا۔
اگر درخواست گزار مطلوبہ شرائط پوری نہ کرے، دستاویزات نامکمل ہوں، امیگریشن قوانین کی خلاف ورزی کی گئی ہو یا امریکی قانون کے تحت نااہلی کی کوئی وجہ موجود ہو تو ویزا درخواست مسترد کی جا سکتی ہے۔
چونکہ امریکی ورک ویزا سے متعلق قوانین، شرائط، فیس اور مختلف ویزا کیٹیگریز وقتاً فوقتاً تبدیل ہوتی رہتی ہیں، اس لیے درخواست جمع کرانے سے پہلے امریکی سفارت خانے، قونصل خانے یا امریکی شہریت و امیگریشن سروسز (USCIS) کی سرکاری ویب سائٹس سے تازہ ترین معلومات ضرور حاصل کریں تاکہ درخواست موجودہ ضوابط کے مطابق جمع کرائی جا سکے۔
