ایرانی صدر کے ہمراہ اعلیٰ سطح کا وفد بھی پاکستان آیا ہے، جس میں سینئر حکومتی عہدیدار، سفارت کار اور مختلف شعبوں سے تعلق رکھنے والے نمائندے شامل ہیں۔ دورے کے دوران دونوں ممالک کے درمیان مختلف شعبوں میں تعاون بڑھانے کے امکانات کا جائزہ لیا جائے گا۔
ایرانی صدر جس خصوصی طیارے کے ذریعے پاکستان پہنچے، اس کا نام ’’میناب‘‘ رکھا گیا ہے، یہ نام ایران میں ایک تعلیمی ادارے پر حملے میں شہید ہونے والے بچوں کی یاد میں رکھا گیا تھا، جسے قومی سطح پر خصوصی اہمیت حاصل ہے۔
دورے کے دوران صدر مسعود پزشکیان صدر آصف علی زرداری اور وزیراعظم شہباز شریف سے علیحدہ علیحدہ ملاقاتیں کریں گے، جبکہ وفود کی سطح پر بھی مذاکرات متوقع ہیں۔ ان ملاقاتوں میں پاک ایران تعلقات، سرحدی تعاون، تجارت، توانائی، علاقائی سلامتی اور باہمی دلچسپی کے دیگر امور زیر بحث آئیں گے۔
ایرانی صدر مسعود پزشکیان کے ہمراہ مشترکہ پریس کانفرنس سے خطاب کرتے ہوئے وزیرِاعظم نے کہا کہ اسلام آباد مفاہمتی یادداشت پر دستخط کے بعد وہ اس پیش رفت پر بے حد خوش ہیں اور ایرانی صدر کو پاکستان آمد پر خوش آمدید کہتے ہیں۔
شہباز شریف نے کہا کہ امریکا اور ایران کے درمیان جاری سفارتی پیش رفت کے نتیجے میں امن کی راہ ہموار ہو سکتی ہے، اور پاکستان اس پورے عمل میں سہولت کار کا کردار ادا کرتا رہے گا۔ ان کے مطابق پاکستان اس بات کا خواہاں ہے کہ تمام فریقین ایک جامع اور پائیدار معاہدے تک پہنچیں۔
انہوں نے مزید کہا کہ پاکستان ایران کے ساتھ ہر شعبے میں تعاون کو فروغ دینا چاہتا ہے اور ایران ایک بڑی معیشت بننے کی مکمل صلاحیت رکھتا ہے۔ وزیرِاعظم نے امن کی کوششوں میں کردار ادا کرنے والے دوست ممالک کو بھی خراجِ تحسین پیش کیا۔
وزیرِاعظم نے اس عمل میں نائب وزیرِاعظم اسحاق ڈار، فیلڈ مارشل عاصم منیر، وزیر داخلہ محسن نقوی اور ایرانی وزیر خارجہ عباس عراقچی کے کردار کو سراہا اور کہا کہ مذاکراتی عمل میں ان کی کوششیں قابلِ تعریف ہیں۔
ایرانی صدر مسعود پزشکیان ایک روزہ دورے پر پاکستان پہنچے جہاں نور خان ایئربیس پر صدر آصف علی زرداری اور وزیرِاعظم شہباز شریف نے ان کا استقبال کیا۔ انہیں اکیس توپوں کی سلامی دی گئی جبکہ پاک فضائیہ کے جے ایف سترہ طیاروں نے فضائی سلامی پیش کی۔
وزیرِاعظم شہباز شریف کے ہمراہ مشترکہ پریس کانفرنس سے خطاب کرتے ہوئے ایرانی صدر نے کہا کہ اسلام آباد مفاہمتی یادداشت پر دستخط پاکستان پر اعتماد کی بنیاد پر ممکن ہوئے۔ ان کے مطابق ایران اور پاکستان کی دوستی “یک جان دو قالب” کی حیثیت رکھتی ہے۔
ایرانی صدر نے کہا کہ پاکستان صرف ہمسایہ ملک نہیں بلکہ ایک برادر اور دوست ملک ہے، اور دونوں ممالک کے عوام کی منزل اور مفادات ایک جیسے ہیں۔ انہوں نے کہا کہ مستقبل میں ایران اور پاکستان کے تعلقات مزید مضبوط ہوں گے اور ایرانی حکومت اور عوام پاکستان کی حمایت پر شکر گزار ہیں۔
مسعود پزشکیان نے کہا کہ امن، ترقی اور خوشحالی کے لیے پاکستان کے کردار کو قدر کی نگاہ سے دیکھا جاتا ہے اور مذاکراتی عمل میں پاکستان نے مثبت اور مؤثر کردار ادا کیا ہے۔ انہوں نے وزیرِاعظم شہباز شریف کی دعوت پر شکریہ ادا کرتے ہوئے کہا کہ ان کی صدرِ پاکستان، وزیرِاعظم اور فیلڈ مارشل سے تعمیری ملاقاتیں ہوئیں۔
اس موقع پر وزیرِاعظم شہباز شریف نے کہا کہ اسلام آباد مفاہمتی یادداشت ایک بڑی کامیابی ہے اور پاکستان امریکا اور ایران کے درمیان پائیدار امن معاہدے تک اپنا کردار ادا کرتا رہے گا۔ ان کے مطابق پاکستان خطے میں امن کے فروغ کے لیے ہر ممکن کوشش جاری رکھے گا۔
وزیرِاعظم نے ایران کے میزائل پروگرام سے متعلق گفتگو کرتے ہوئے کہا کہ یہ توازن کا معاملہ ہے اور کسی بھی ملک کو اس صلاحیت سے محروم نہیں رکھا جا سکتا جو دیگر ممالک کے پاس موجود ہو۔
واضح رہے کہ ایرانی صدر ایک روزہ دورے پر پاکستان آئے تھے جہاں نور خان ایئربیس پر صدرِ پاکستان آصف علی زرداری اور وزیرِاعظم شہباز شریف نے ان کا استقبال کیا تھا۔ بعد ازاں انہیں اکیس توپوں کی سلامی دی گئی اور اعلیٰ سطحی ملاقاتوں کا سلسلہ بھی ہوا۔۔
مزید پڑھیں: پاکستان نے ایران امریکا مفاہمت میں تاریخی کردار ادا کیا، یہ بڑی سفارتی کامیابی ہے، وزیراعظم شہباز شریف
یاد ر ہے کہ صدر مسعود پزشکیان کا یہ دورہ ایسے وقت میں ہو رہا ہے جب خطے میں اہم سفارتی سرگرمیاں جاری ہیں، اس لیے اس دورے کو دونوں ممالک کے تعلقات کے لیے انتہائی اہم قرار دیا جا رہا ہے۔
واضح رہے کہ پاکستان اور ایران کے درمیان قریبی تعاون نہ صرف دوطرفہ تعلقات کو مزید مضبوط بنا سکتا ہے بلکہ خطے میں امن، استحکام اور اقتصادی رابطوں کے فروغ میں بھی اہم کردار ادا کر سکتا ہے۔ اسی تناظر میں صدر پزشکیان کے دورے کو دونوں ممالک کے لیے ایک اہم سفارتی پیش رفت قرار دیا جا رہا ہے۔
